Instagram- og OnlyFans-stjarnan Mary Magdalene er látin, 33 ára að aldri, en hún fannst látin fyrir utan hótelbyggingu á taílensku eyjunni Phuket í síðustu viku.

Mary vakti jafnan athygli hvert sem hún fór enda hafði hún gengist undir ógrynni lýtaaðgerða á síðustu árum, auk þess að vera þakin húðflúrum.

Mary, sem hét réttu nafn Denise Ivonne Jarvis Gongora, var fædd og uppalin í Mexíkó en var þar að auki með kanadískt ríkisfang.

Mail Online greinir frá því að Mary hafi fallið af svölum hótelherbergis síns á 9. hæð.

Rannsókn málsins stendur yfir, en ekki leikur grunur á að eitthvað saknæmt hafi átt sér stað. Starfsfólks hótelsins segist hafa séð Mary koma inn á hótelið síðastliðinn þriðjudag, en tíu mínútum síðar hafi hún fallið niður af svölunum.

Mary var með um hálfa milljón fylgjenda á samfélagsmiðlum en hún lýsti því meðal annars að hún hefði fengið strangt uppeldi þar sem henni var meðal annars bannað að horfa á teiknimyndir frá Disney.

Hún gerði uppreisn gegn foreldrum sínum og hóf að nota eiturlyf og stunda kynlíf. Hún reyndi fyrir sér sem strippari þegar hún var aðeins sautján ára og gerðist fylgdarkona skömmu síðar.

Síðar stofnaði hún síðu á OnlyFans og segir hún að það hafi verið hennar leið út úr vændinu.