Dráttarvextir eru skelfilega háir á Íslandi, í raun algjört rán, og hafa haldist það, kannski vegna þess að þeir sem eru í skuldabasli eiga fáa málsvara.

Fólk getur kannski að einhverju leyti kennt sjálfu sér um, en það er ekki þar með sagt að þeir sem skulda eigi ekki að hafa neinn rétt.

Þeir sem lenda í að þurfa að borga dráttarvexti geta sokkið fljótt ofan í skuldafen, vextirnir eru slíkir að þeir taka fljótt öll ráð af skuldurunum. Dráttarvextir eru refsing, því þeir eru langt umfram verðlagsþróun.

Ég man eftir loforðum um að lækka dráttarvexti verulega stuttu eftir hrun. Ég man ekki til þess að við þau hafi verið staðið.

Þess vegna er þetta frumvarp Illuga Gunnarssonar mjög tímabært.