Fleiri ánægð en óánægð með breytingar á lögum um hunda- og kattahald í fjölbýli. Í könnun sem Prósent framkvæmdi dagana 18. nóvember til 2. desember 2025 var spurt að eftirfarandi:

Alþingi samþykkti nýlega frumvarp um breytingu á lögum um hunda- og kattahald í fjöleignarhúsum. Grunnregla fjöleignarhúsalaganna, um að hunda- og kattahald sé bannað í fjölbýlishúsum nema samþykki aukins meirihluta eigenda um annað liggi fyrir, hefur verið snúið við og er hunda- og kattahald nú leyft í fjölbýli nema samþykki aukins meirihluta eigenda liggi fyrir um annað.

Hversu ánæg(ð/ður/t) eða óánæg(ð/ður/t) ert þú með breytingar á lögum um hunda- og kattahald í fjölbýli?

49% Íslendinga eru ánægð með breytingar á lögum um hunda- og kattahald í fjölbýli, 32% eru óánægð með breytinguna og 18% eru hvorki ánægð eða óánægð.

Það sem vekur mesta athygli í könnuninni er að þau sem búa í raðhúsi, parhúsi, íbúð í fjölbýlishúsi eða blokkaríbúð eru marktækt ánægðari með breytinguna en þau sem búa í einbýlishúsi. 35% þeirra sem búa í einbýlishúsi eru óánægðir með breytinguna á lögum um hunda- og kattahald í fjöleignarhúsum, en eins og lagaheitið gefur til kynna þá snertir það ekkert hagsmuni þeirra sem búa í einbýli.

Konur eru marktækt ánægðari með breytinguna en karlar, 59% kvenna segjast ánægðar á móti 40% karla.

Þau sem eru 25-34 ára eru marktækt ánægðari með breytinguna en aðrir aldurshópar. Þau sem eru 65 ára eða eldri eru marktækt óánægðari með breytinguna en þau sem yngri eru.

Þau sem eiga hund og/eða kött eru marktækt ánægðari með breytinguna en þau sem eiga ekki hund og/eða kött. 69% þeirra sem eiga hund og/eða kött eru ánægð með breytinguna og 14% óánægð. 32% sem eiga ekki hund og/eða kött eru ánægð með breytinguna og 48% eru óánægð.

46% þjóðarinnar á hund(a), kött/ketti eða hvoru tveggja.

Gögnum í könnuninni var safnað frá 18. nóvember til 2. desember 2025, úrtak var 2000 manns og var svarhlutfall 49%.