Það er sagt að undirskriftasöfnun Indefence sé keyrð saman við þjóðskrá til að sannreyna kennitölur. Milli tvö og þrjú í nótt skráðu, samkvæmt stikkprufu, að minnsta kosti fjögur börn á aldrinum eins til fjögurra ára sig í söfnunina. Auks fjölda unglinga sem eru undir kosningaldri eða rétt við hann.

Voru þessi ungmenni að skrá sig sjálf – eða stóðu einhverjir aðrir fyrir því? Innskráningarnar virtust vera sérkennilega háttbundnar þessa nótt, svo síðari kosturinn er mun líklegri.

Og svo eru það þeir sem eru skráðir án þess að vita af því – hversu margir af þeim ætli hafi fyrir því að tékka á því hvort þeir séu á skrá eins og Einar Örn Einarsson?

Sjálfur er ég búinn að vera lengi á netinu – í febrúar verða liðin tíu ár síðan ég byrjaði að halda úti vefsíðu. Og eitt hef ég lært – ef einhver möguleiki er að svindla á netkosningu eða netkönnun, þá er nánast öruggt að einhver mun notfæra sér það.

Annars eru menn farnir að velta alvarlega fyrir sér hvað verður ef Ólafur Ragnar skrifar ekki undir. Guðmundur Svansson setur saman þessa skarplegu greiningu.