Það er athyglisvert að enginn þeirra sem gerir tilboð í Perluna treystir sér til að reka húsið eins og það er. Allir vilja fá að gera breytingar á starfseminni og svæðinu í kring.

Umhverfis Perluna eru aðallega bílastæði – svo það er kannski allt í lagi að gera nokkrar breytingar.

Það er merkilegt að í leiðara Morgunblaðsins í fyrradag var talað um söluna á Perlunni – og í framhaldi af því var Samfylkingin kölluð spillasti stjórnmálaflokkur Íslandssögunnar eða eitthvað á þá leið.

Því það var talsverð umræða vegna spillingar í kringum byggingu Perlunnar á sínum tíma.

Húsið fór langt fram úr kostnaðaráætlun – reyndar virðist áætlunin bara hafa verið upp á punt – borgarendurskoðun skilaði á sínum tíma áliti um byggingu Perlunnar og sagði þar að hún hefði gjörsamlega farið úr böndunum og það hefði verið langt í frá að eðlilega hefði verið staðið að framkvæmdunum.

Menn geta svo deilt um hversu falleg bygging Perlan er, eitt er merkilegt við hönnun hennar, það hefði verið eðlilegt og maklegt að halda samkeppni um svo stóra og áberandi opinbera framkvæmd.

En það var ekki gert, heldur var einfaldlega haft samband við einn af arkitektunum sem borgarstjórinn á þeim tíma og flokkur hans höfðu velþóknun á og hann látinn sjá um verkið.