Það er sagt að Kínverjar horfi til mjög langs tíma.

En varðandi hernaðarumsvif á Grímsstöðum á Fjöllum er þeim sjálfum við brugðið.

Planið gæti verið á þá leið að þeir bíði eftir því að hlýnun jarðar sé orðin slík að að sjávarborð hafi færst alla leið þangað uppeftir  – þá væri hugsanlega hægt að opna skipalægið og senda kafbátana af stað út á höfin.

En svo kemur í ljós á nefndarfundi á Alþingi að Huang Nubo eigi miklar eignir – þjóðgarða, fjöll og menningarþorp. Ekki var um það fjallað að þetta tengdist hernaði eða hernaðarlist.

Kannski er nær að fjalla um þetta eins og Michel Houellebecq gerir í nýjustu skáldsögu sinni sem nefnist Kortið og landsvæðið? Þar hefur Evrópa svosem ekkert liðið undir lok, það ríkir ágæt velmegun, en hún er orðin eins og eitt stórt menningarþorp, sýningarsvæði,  þar sem ferðamenn frá Austur-Asíu geta komið og skoðað hina merku evrópsku menningu – sem náttúrlega hefur liðið undir lok, er bara safngripur.

Annars er hreint makalaust hvað er mikið búið að fjalla um þetta hér án þess að nái að koma fram einföldustu staðreyndir. En það er nóg af getgátum – það er jafnvel eins og það henti best í því andrúmslofti sem ríkir á Íslandi í dag.