Það verða hinn frekar litlausi Francois Hollande og Nicolas Sarkozy forseti sem keppa í seinni umferð frönsku forsetakosninganna.

Í raun er merkilegt að sjá hvernig atkvæðin dreifast, það er enginn sem tekur afgerandi forystu. Sarkozy er mjög óvinsæll og fær ekki nema 27,1 prósent. Það er afhroð fyrir sitjandi forseta og skilaboð um að Frakkland sé búið að fá nóg af honum. Hollande fær 28,6 prósent.

Sigurvegari þessarar umferðar er í raun Marine Le Pen, foringi Þjóðfylkingarinnar. Flokkur hennar fær 18 prósent – það þykir mörgum skuggalega há tala fyrir öfgaflokk til hægri.

Nú eru tvær vikur þangað til kosið verður milli Sarkozys og Hollandi. Þá hefst tími þar sem frambjóðendurnir fara að biðla til kjósendanna sem ekki kusu þá í fyrri umferðinni. Hollande þarf að tryggja sér fylgi úr röðum fylgismanna Græningja og vinstri frambjóðandans Jean-Luc Mélenchon, en Sarkozy er í þeirri vondu stöðu að þurfa að reyna að heilla kjósendur Þjóðfylkingarinnar.

Það verður forvitnilegt að fylgjast með næstu vikurnar, en í svipinn hlýtur að teljast líklegra að Hollande sigri. Það er þó ekki víst – kannski telja sumir kjósendur að Sarkozy sé nógsamlega refsað.