Maður hefur lengi heyrt orðróm um að 365 kunni að vera til sölu. Aðaleigandinn er Ingibjörg Pálmadóttir, eiginkona Jóns Ásgeirs, sagan segir að það sé ekki víst að hún kæri sig um að eiga fjölmiðlafyrirtækið til lengdar. Reksturinn mun vera í þokkalegu jafnvægi, en áskriftarsala hefur ekki staðið undir væntingum í vetur.

Þetta er að mörgu leyti metnaðarfullt og gott fyrirtæki – með mörgu góðu stafsfólki innanborðs – en það hefur löngum liðið fyrir vafasama eigendur. Varla var það tilviljun að þegar allt hrundi passaði Jón Ásgeir best upp á að 365 hyrfi ekki úr eigu sinni – eða eigum við að kalla það áhrifasvæði? Sjálfur hefur hann starfsaðstöðu í Skaftahlíðinni.

Það hefur hins vegar verið óljósara hverjir kynnu að vilja kaupa og hvers vegna?

Á Íslandi hafa menn löngum keypt fjölmiðla til að hafa áhrif í gegnum þá.

Í eigendahópi Stöðvar 2 voru á sínum tíma eilífar deilur, Jón Ólafsson seldi fyrirtækið loks til Jóns Ásgeirs. Björgólfur Guðmundsson keypti Morgunblaðið og átti það um tíma. Nú er blaðið eigu stórútgerðarfólks. Það er ansi mikil hætta á að kaup á 365 yrðu gerð á einhverjum slíkum forsendum.

Best væri auðvitað að nýjir eigendur fyrirtækisins keyptu einfaldlega vegna þess að þá langaði að halda úti góðum og skemmtilegum fjölmiðlum. Þess vegna verður maður pínulítið vonglaður þegar maður sér að Simma og Jóa langar að kaupa 365. Þeir eru fínir fjölmiðlamenn – ég get ekki ímyndað mér að þeir myndu líta að eign í fjölmiðlum sem part af einhverju valdageimi.

Svo koma ábyggilega upp vangaveltur um að einhverjir aðrir séu að baki þeim, ég vona ekki – það er bara að gefa í og selja fleiri hamborgara.