Í nýju hefti Þjóðmála birtist afar sérstæð grein eftir Örvar Arnarson. Í tímaritinu er greint frá því að Örvar sé fjármálastjóri.

Greinin fjallar um krúttin svokölluðu – sem höfundur segir að séu mjög áberandi eftir bankahrunið. Ekki er gerð mikil tilraun til að skilgreina hvað felst í því að vera krútt, en þeim eru ekki vandaðar kveðjurnar.

Krúttin eru sögð vera full af óraunhæfum hugmyndum, greinin nefnist: Varúð, himnaríki á jörðu.

Það er semsagt himnaríki krúttanna – sem þykjast vera málsvarar umhverfis og náttúru – „eða hvað menn vilja kalla þessa einstaklinga sem krefjast lýðræðis, mannréttinda, persónukjörs, græns hagkerfis, bestu menntunar og heilbrigðiskerfis fyrir allara, réttlætis og virðingar fyrir náttúrunni og helst að aðrir borgi brúsann.“

Það er þó ekki allt sem sýnist með krúttinn, samkvæmt greininni, þeim er nefnilega stjórnað af vinstri mönnum sem miskunnarlaust smala þeim með loforðum um að „himnaríki á jörðu sé í seilingarfjarlægð“.

Og það er eins og segir – „himnaríki hinnar kommúnísku hugsjónar“.