Sarkozy Frakklandsforseti sækist nú eftir endurkjöri undir kjörorðinu Sterkt Frakkland.

En Sarkozy á í erfiðleikum, það sem helst getur bjargað honum er að mótframbjóðendur hans eru veikir.

Þegar Sarkozy var kosinn fyrir fimm árum var það með fyrirheitum um að breyta Frakklandi í átt þess sem hefur gerst í Bretlandi, hann ætlaði að vinna í anda markaðshyggju.

Svo kom efnahagskreppan 2008 og þá sneri Sarkozy við blaðinu. Frakkland stóð nokkuð vel af sér kreppuna til að byrja með – þá var það lína Sarkozys að Frakkland hefði sérstöðu með sínu blandaða hagkerfi.

Nú er Frakkland í efnahagsörðugleikum eins og stór hluti Evrópu. Samkvæmt síðustu mælingum er hagvöxtur þar sama og enginn, margir franskir bankar þykja standa tæpt.

En þá snýr Sarkozy sér að útlendingum. Hann er reyndar af innflytjendaættum sjálfur – en nú álítur hann það vænlegast til árangurs að færa sig nær öfgahægrikonunni Marine Le Pen til að reyna að ná af henni einhverju fylgi.

Mörgum virtist eins og Sarkozy væri harður nagli þegar hann var kosinn forseti. Nú er aðallega talað um hann sem tækifærissinna – og arfleifð hans er aðallega sú að hafa kvænst ítalskri fyrirsætu.