Það var löng yfirheyrsla yfir Davíð Oddssyni í Þjóðmenningarhúsinu í gær. Þessi fyrrverandi forsætisráðherra þjóðarinnar er einkennilega samsettur maður.

Hann ber aldrei ábyrgð á neinu, og í þau fáu skipti sem ábyrgð er rakin upp í túnfótinn hjá honum, þá kemst hann að því að hann hafi í raun ekki haft nein völd sjálfur.

Það er alltaf allt öðrum að kenna. Hann hefur aldrei haft rangt fyrir sér. Og það er óhugsandi að biðjast afsökunar á neinu, það er frekar að veruleikanum sé snúið á haus en að viðurkenna mistök.

Nú situr forsætisráðherrann sem ritstjóri Morgunblaðsins og kennir öllum öðrum um hvernig fór á þeim langa tíma sem hann var valdamesti maður landsins.

Bak við þetta býr sérstæð sýn á tilveruna – hún byggir á því að samfélagið sé samansett úr gengjum sem takast á. Þessi sýn virðist hafa litað allan stjórnmálaferil hans.

Það var upplýst í fjölmiðlum í gær að það væru ellefu gengi að störfum hér á landi – en samkvæmt þessari sýn eru þau miklu fleiri.