Í Kiljunni í kvöld förum við í Hvalfjörð með Magnúsi Þór Hafsteinssyni. Magnús hefur skrifað bókina Dauðann í Dumbshafi, en þar fjallar hann um skipalestirnar miklu sem sigldu framhjá Íslandi á leiðinni til Sovétríkjanna í heimstyrjöldinni síðari. Hvalfjörður var lægi fyrir þessi skip – oft voru þar tugir skipa. Þetta er dramatísk saga af miklum hildarleik.
Við lítum á stríðsminjar í Hvalfirði og sjáum stórmerkilegar kvikmyndir frá þessum tíma.
Jónína Leósdóttir kemur í þáttinn og segir frá nýrri bók eftir sig sem nefnist Léttir.
Páll Baldvin og Kolbrún fjalla um tvær bækur: Mannvist, sýnisbók íslenskra fornleifa, eftir Birnu Lárusdóttur og Með heiminn í vasanum eftir Margréti Örnólfsdóttur. Báðar bækurnar fengu fjöruverðlaunin um daginn, hvor í sínum flokki.
Bragi talar um höfund sem borðaði 21 egg.
Hvalfjörður fullur af skipum í heimstyrjöldinni. Mikil leynd hvíldi yfir skipalestunum.
