Í morgun tók ég viðtal við mjög áhugaverða konu fyrir Kiljuna.

Hún heitir Sandi Toksvig og er hingað komin til að afhenda Fjöruverðlaunin, bókmenntaverðlaun kvenna.

Toksvig er óhemju dugleg kona. Hún er grínisti, gamanleikkonna, höfundur barna- og fullorðinsbóka, útvarpskona, sjónvarpskona, dálkahöfundur.

Hún hefur líka setið í dómnefndum Orangeverðlaunanna, það eru verðlauns sem eru veitt fyrir bækur eftir konur og hafa öðlast mikla virðingu.

Toksvig hefur skrifað mjög áhugaverða barnabók sen nefnist Hitler´s Canary, hún fjallar um björgun danskra gyðinga á stríðsárunum. En hún var líka að leggja hönd á nýja fullorðinsbók sem fjallar um átök Breta og Hollendinga í Suður-Afríku í lok 19. aldar.

Hún stjórnar tveimur útvarpsþáttum hjá BBC, spurningaleiknum News Quiz og ferðaþættinum Excess Baggage. Hún heldur uppistandssýningar víða um Bretland, en að auki er hún fastagestur í sjónvarpsþætti Stephen Fry sem nefnist QI. Hún og Fry eru gamlir vinir, voru saman í Cambridge á sínum tíma.

Annars er Toksvig af dönskum ættum, faðir hennar var einn frægasti blaða- og útvarpsmaður Danmerkur og hét Claus Toksvig. Sandi er alin upp í Bandaríkjunum og Bretlandi, talar dönsku, en enska er þó hennar aðaltungumál.