Skoðanakönnun MMR sem birtist í dag er gerð áður en Sjálfstæðismenn héldu landsfund sinn og sömuleiðis Vinstri grænir.

Það er fyrirvarinn sem má gera við hana.

En þrátt fyrir það sýnir hún glögga tilhneigingu. Framsóknarmenn eru að taka mikið fylgi frá Sjálfstæðisflokknum. Eins og staðan er núna lítur út fyrir að Sjálfstæðisflokkurinn eigi alls engan kosningasigur í vændum.

Og Björt framtíð hirðir fylgi af Samfylkingunni.

Fylgið er semsagt að leita frá stóru flokkunum til þeirra flokka sem standa þeim næst – og eru líkastir þeim.

Miðað við þetta þýðir lítið fyrir Sjálfstæðisflokk og Samfylkingu að bölsótast hvor yfir öðrum, flokkarnir þurfa að líta sér nær.

Skoðanakönnunin sýnir líka að líklegasta stjórnarmynstrið eftir kosningar er hið gamalkunna Sjálfstæðisflokkur/Framsókn. Vinstri vængurinn er alveg tvístraður.

Slík stjórn myndi aðallega hafa að markmiði að keyra upp hagvöxt á Íslandi og það er nokkuð sem þarf að ræða fyrir kosningarnar.

Er hægt að auka hagvöxtinn mikið, hvaða aðferðir notum við til þess, gæti það orðið varanlegt – eða værum við bara að blása í nýja bólu?