Christine Lagarde, forstjóri Alþjóðagjaldeyrissjóðsins, segir að ríkisstjórnir verði að halda sér frá verndarstefnu í öllum myndum. Hið fjölbreytta viðskiptakerfi sem er við lýði hafi átt sinn þátt í að þeim sem lifa í mikilli fátækt hefur fækkað um helming. Á móti muni verndarstefna og viðskiptahindranir koma í veg fyrir að framleiðni aukist.

Hún hvetur ríki heims til að opna enn frekar fyrir alþjóðaviðskipti með því að endurbæta eigin framkvæmd í þeim efnum í stað þess að reisa nýja viðskiptamúra. Ekki er annað hægt en að skilja orð hennar á þann veg en að hún sé að vara Donald Trump, Bandaríkjaforseta, við en hann hefur hrundið viðskiptastríði af stað við Kína.

Lagarde segir að það sé misskilningur að líta á óhagstæðan viðskiptajöfnuð sem sönnun þess að um ósanngjarnt viðskiptakerfi sé að ræða. Trump hefur margoft haldið þessu fram og þá sérstaklega í tengslum við mikinn viðskiptahalla Bandaríkjanna gagnvart Kína.

Viðskiptastríð Bandaríkjanna og Kína hefur færst í aukana síðan Trump lagði háa tolla á stál og ál frá Kína og nokkrum öðrum ríkjum. Kínverjar svöruðu að bragði með að leggja tolla á rúmlega 120 bandarískar vörur. Þessu svaraði Trump með að kynna lista með 1.300 vörum frá Kína sem verða tolllagðar sérstaklega. Þessu svöruðu Kínverjar með því að segja að tollar kunni að verða lagðir á rúmlega 100 bandarískar vörur til viðbótar. Þetta hefur valdið titringi í viðskiptaheiminum.