Allt stefnir í að stjórnarmeirihlutinn verði með formennsku í öllum átta fastanefndum þingsins. Líkt og greint hefur verið frá stóð til að meirihlutinn fengi sex formenn af átta, Sjálfstæðisflokkurinn með fimm og Viðreisn og Björt framtíð skipti með sér einni nefnd. Sjálfstæðisflokkurinn setti skilyrði um að Lilja Alfreðsdóttir varaformaður Framsóknarflokksins, yrði formaður efnahags- og viðskiptanefndar. Þetta staðfesti Birgir Ármannsson þingflokksformaður Sjálfstæðisflokksins í Fréttablaðinu í dag. Stjórnarandstaðan féllst ekki á það skilyrði þrátt fyrir að vera sammála um að skipta formennsku í þremur nefndum niður á Vinstri græna, Pírata og Framsóknarflokkinn.
Birgitta Jónsdóttir þingflokksformaður Pírata segir það óþægilegt að Sjálfstæðisflokkurinn setji skilyrði um hvaða flokkur og þingmaður gegni formennsku í fastanefnd, það eigi minnihlutinn að gera í samstarfi. Birgitta ræddi um málið ásamt Birgi í Morgunútvarpinu á Rás 2 í morgun, sagði hún að á einhverjum tímapunkti í viðræðum stjórnar og stjórnarandstöðu um málið hafi einhverjir baksamningar átt sér stað:
Í raun og veru það sem var furðulegast við þetta var að Sigurður Ingi kemur inn á þennan sameiginlega fund, Þórunn var erlendis, og kemur inn í þessar samningaviðræður og segir mjög skírt að Framsóknarflokkurinn hafi ekki áhuga á efnahags- og viðskiptanefnd til þess að hægt sé að hafa samkomulag milli minnihlutaflokkanna og leggur því til að þeir taki við formennsku í umhverfis- og samgöngunefnd,
sagði Birgitta. Birgir segir að líta þurfi á heildarmyndina, hnútur hafi verið kominn á viðræðurnar og allt útlit hafi verið fyrir að ekki næðist samkomulag þegar Framsóknarflokkurinn kom með hugmyndina um að Lilja yrði formaður efnahags- og viðskiptanefndar:
„…hugmynd Framsóknar, að þeir kæmu með kandídat í efnahags- og viðskiptanefnd. Við sögðum Já, ókei. Þetta er eitthvað sem við getum hugsað okkur að fallast á,“
sagði Birgir. Bjarni Benediktsson forsætisráðherra og formaður Sjálfstæðisflokksins sagði í gær að niðurstaðan í málinu hafi orðið til vegna innbyrgðis ágreinings í stjórnarandstöðunni.
Ari Brynjólfsson – ari@pressan.is
