Forystumenn stjórnmálaflokka á Alþingi keppast við að lofa að gera það, sem þeir hafa ekki gert, allt frá hruni, aftengja frítekjumarkið, hækka skattleysismörkin og bæta kjör lífeyrisþega og öryrkja, sem fá greiðslur frá TR.
Svik eftir hrun
Formaður Sjálfstæðisflokksins kemur í þriðja sinn fram með fyrirheit, sem hann hefur tvívegis áður svikið fyrir kosningar, 2013 og 2016, og formenn Vinstri grænna og Samfylkingar ætla allt að gera fyrir þá, sem þessir flokkar sviku eftir hrun með því að skerða mest greiðslur TR og sjúkratrygginga til þeirra sem þurftu og mynda skjaldborg um banka, fjármagnseigendur og vogunarsjóði, en ekki heimilin.
Fjármálaráðherra vinstri stjórnarinnar framseldi eignarhluti ríkisins í Arion banka og Íslandsbanka til slitabúa Kaupþings og Glitnis síðla árs 2009, án heimildar í lögum og í framhaldi keyptu hrægammasjóðir skuldir bankanna á 3–7% , sem þeir síðan innheimtu á heimilin í landinu 100% með þeim afleiðingum að um 10 þúsund heimili voru upprætt.
Bótaþegar ekki með
Þessir forystumenn vitna oft í hversu staðan sé góð á Íslandi, einkum forystumenn síðustu ríkisstjórnar með tilvísun í að meðallaun séu 719 þús á mánuði. Bótaþegar eru ekki með í þessari úttekt og ef miðað er við stuðul OECD er helmingur af meðallaunum viðmiðun að fátækt. Í úttekt frá OECD segir að þjóðartekjur á mann séu þær þriðju hæstu meðal aðildarríkja 2017. Andstæða þessa er önnur úttekt frá OECD frá 2013 sem segir að íslenska ríkið greiði minnst allra aðildarríkja til eftirlaunaþega, eða 1,93% af þjóðartekjum. Ef bætt er við „ólöglegu“ framlagi lífeyrissjóðanna til TR, þá er Ísland í 8. neðsta sæti.
Láglaunafólk svikið
Skattleysismörk eru ákveðin án viðmiðs við launavísitölu, sem ættu í dag að vera um 280 þúsund á mánuði sem skattfrjálsar tekjur, en eru í þess stað um 142 þúsund. Handvirk stjórnun ríkisstjórna frá 1988 til að svíkja láglaunafólk, eldri borgara með launatryggingu frá TR og öryrkja um launin sín!
Flokkurinn er nýtt stjórnmálaafl með fimm áhersluatriði í stefnuskrá sinni, sem hann lofar að standa við og svíkja ekki, til að leiðrétta þá mismunun sem að framan greinir. Auk þessa hefur flokkurinn sett fram skýra málefnaskrá, sem hægt er að kynna sér á flokkurfolksins.is. ásamt með áhersluatriðunum og hvernig kostuð verður án skattahækkana.
Höfundur er Halldór Gunnarsson, oddviti í framboði Flokks fólksins í Norðausturkjördæmi.
