Frá því að tilfærzla verkefna frá ríki til sveitarfélaga hófst af krafti fyrir allmörgum árum hefur borið á töluverðri óánægju forsvarsmanna sveitarfélaganna með þá litlu fjármuni sem fylgt hafa verkefnunum, auk þess sem samningar um sum þeirra hafa runnið út án þess að nýir hafi verið gerðir í staðinn.
Eitt dæmi um slíkt snýr að öryggisvistun Akureyrarbæjar fyrir árið 2017. Akureyrarbær sinnir því verkefni fyrir ríkið og leggur út allan kostnað vegna þess, jafnvel þó enginn samningur þar að lútandi sé í gildi.
Tregða ríkisvaldsins
Annað dæmi snýr að rekstri Öldrunarheimila Akureyrarbæjar. Ríkið greiðir daggjöld með hverjum íbúa þeirra, sem eiga að byggja á þjónustustöðlum sem ríkið setur sjálft og eiga að nægja fyrir launum og öðrum rekstrarkostnaði. Nú er þó svo komið að Akureyrarbær hefur á undanförnum fimm árum greitt 843 milljónir með rekstrinum vegna þess að daggjöld hrökkva of skammt.
Undanfarin misseri hef ég heyrt fleiri dæmi um tregðu ríkisvaldsins til að standa við gerða samninga. Það er þyngra en tárum taki að sveitarfélögin þurfi að standa í endalausu stappi, jafnvel málaferlum, við að krefja ríkið um efndir á samningum. Það er eðlilegt að sveitarfélögin skipuleggi og sinni helztu þjónustu við íbúana en til þess þarf fjármuni.
Efla atvinnulíf
Eitt helzta baráttumál okkar Pírata, burtséð frá því að ríkið standi við gerða samninga, er að efla sveitarfélögin fjárhagslega þannig að þau eigi auðveldara með að sinna lögbundnum skyldum sínum og veita íbúum góða þjónustu. Við höfum talað fyrir því að gistináttagjald verði eftir í þeim sveitarfélögum þar sem það fellur til, auk þess sem það gæti líka átt við virðisaukaskattinn að hluta og aðra tekjustofna.
Samhliða þessu þarf að efla atvinnulíf á landsbyggðunum, t.d. með bættu flutningskerfi raforku og meiri hlutdeild í ferðamannaiðnaðinum. Sú staðreynd að flugvélaeldsneyti er dýrara á flugvöllunum á Akureyri og Egilsstöðum er ekki til að bæta samkeppnisaðstöðu þeirra gagnvart Keflavíkurflugvelli. Þessu má breyta með litlum tilkostnaði, t.d. með því að færa þessa tegund eldsneytis undir lög um jöfnun flutningskostnaðar á eldsneyti.
Fái ég brautargengi í komandi kosningum til Alþingis mun ég beita mér í framangreindum málum og mörgum fleiri, líkt og hingað til. Það er til mikils að vinna. Meiri hagsæld og aukin lífsgæði eru í húfi.
Höfundur er Einar Brynjólfsson, þingmaður og oddviti Pírata í Norðausturkjördæmi.
