Sigurður Ingi Jóhannsson, formaður Framsóknarflokksins, sagði í útvarpsþættinum Harmageddon á útvarpsstöðinni X-inu í morgun
að einfaldast væri að mynda ríkisstjórn með Sjálfstæðisflokknum og VG. Hann sagðist einnig hafa hvatt Katrínu Jakobsdóttur formann VG, að halda stjórnarmyndunarumboðinu og taka Sjálfstæðisflokkinn með í viðræður, eftir að slitnaði upp úr viðræðum núverandi stjórnarandstöðuflokka síðastliðinn mánudag.

Þetta er kunnuglegt stef hjá Sigurði Inga, sem talaði aftur um að skapa sátt frá hægri til vinstri
sem samstarf Sjálfstæðisflokksins, VG og Framsóknar yrði. Þá leist honum ekki á samstarf Framsóknarflokks,
Sjálfstæðisflokks, Miðflokks og flokks fólksins, því það myndi ekki skapa nægilega sátt í samfélaginu.

Hann segist einnig hafa lagt það til að það yrðu jafnvel sex flokkar í ríkisstjórn, en fram hefur komið að
hann hafi ekki viljað fá aðkomu Viðreisnar líkt og Logi Einarsson formaður Samfylkingar sagðist hafa lagt til.
Hinsvegar talaði Sigurður Ingi við Sigmund Davíð formann Miðflokksins, sem hafði verið tilbúinn til viðræðna,
en ekkert hafi komið út úr því.