Rik Elfrink blaðamaður ED í Hollandi segir að Albert Guðmundsson sé alltof góður til að spila fyrir varalið PSV.

Albert hefur að mestu spilað með varaliðinu í vetur í næst efstu deild Hollands. Þar hefur hann átt afar góðu gengi að fagna.

Albert skoraði tvö mörk í 6-0 sigri á Go Ahead Eagles í gær en leikurinn var flautaður af undir lokin vegna þess að þrumur og eldingar voru á vellinum.

,,Guðmundsson er klár fyrir næsta gæðaflokk, það er það eina sem er hægt að segja um þetta tímabil hans,“ skrifar Elfrink.

,,Það á líka við um nokkra aðra leikmenn liðsins, þeir sanna að þeir eru klárir í úrvalsdeildina,“ segir í umfjölluninni en Albert hefur fengið nokkur tækifæri með aðalliði PSV í vetur.

Albert mun eiga eitt ár eftir af samningi sínum við PSV í sumar en möguleiki er fyrir hendi að hann fari frá félaginu til að gerast fastamaður í aðalliði.

Albert er fæddur árið 1997 en hann á möguleika á að vera í HM hópi Íslands í Rússlandi í sumar.