Undirbúningur fyrir útför Margrétar Þóhildar II Danadrottningar er langt á veg kominn. Mörgum kann að þykja þetta undarlegt í meira lagi enda er drottningin við góða heilsu og sinnir embættisverkum sínum. Drottningin er nú 78 ára gömul og á afmæli næstkomandi mánudag. En það er ekki ráð nema í tíma sé tekið þegar kemur að því að undirbúa útför drottningarinnar því undirbúningurinn hófst fyrir 15 árum síðan og er nú á lokametrunum.
Það var fyrir 15 árum sem drottningin og listamaðurinn Bjørn Nørgaard byrjuðu að ræða hvernig gröf drottningarinnar eigi að líta út. Úr varð að listamaðurinn hannaði glerkistu sem kista drottningarinnar verður sett inn í. Glerkistan verður skreytt með bronsi. Drottningin verður lögð til hinstu hvílu í Dómkirkjunni í Hróarskeldu eins og venja er með þjóðhöfðingja Dana.
Í síðustu viku komu síðustu hlutar glerkistunnar frá glerverksmiðjunni Lhotsky Studio í Tékklandi en þar var kistan, sem jafnframt er minnismerki um drottninguna, gerð. Grafstæði drottningarinnar er því við að verða tilbúið.
BT hefur þetta eftir Lars Band Petersen, framkvæmdastjóra Hróarskeldusóknar.
Ekki er um neina léttavöru að ræða og þurfti krana til að koma kistunni inn í kirkjuna. Petersen sagði að verið væri að leggja lokahönd á grafstæðið, því verki átti upphaflega að ljúka í árslok 2017 en það hefur dregist aðeins. Hann sagði að verkið væri langt komið og væri á lokametrunum.
Sá hluti kirkjunnar þar sem drottningin verður lögð til hinstu hvílu hefur verið alveg lokaður af fyrir almenningi á meðan á þessum framkvæmdum hefur staðið en mikil leynd hefur hvílt yfir verkefninu.
Áætlaður kostnaður við verkið er 29 milljónir danskra króna en það svarar til um 465 milljóna íslenskra króna.
