Ingibjörg Eva Löve hefur verið ákærð fyrir tilraun til manndráps en hún er sökuð um að hafa stungið fyrrverandi kærasta sinn í brjóstkassa. Hún er sögð hafa ruðst inn á heimili hans í Norðurmýrinni grímuklædd ásamt öðrum manni þann 5. júní samkvæmt ákæru. Ingibjörg Eva hefur verið í gæsluvarðhaldi síðan þá.

DV hefur rætt við manninn sem varð fyrir árásinni. Hann segist enn vera að jafna sig eftir atvikið og vildi því ekki að svo stöddu tjá sig um það.

Samkvæmt ákæru réðst Ingibjörg á sinn fyrrverandi kærasta fyrst með hafnaboltakylfu, en hún ku hafa skipst á því að beita henni ásamt manninum sem er ákærður með henni. Hún er sögð hafa stungið sinn fyrrverandi svo með þeim afleiðingum að hann hlaut djúpan skurð yfir rifbili hægra megin á brjóstkassa en litlu mátti muna að hnífurinn snerti innri líffæri. Stungan lá nálægt slagæð aftan við rifbein og hefði getað valdið alvarlegri blæðingu, segir í ákæru.

Málsatvik koma skýrar fram í gæsluvarðhaldsúrskurði sem Hæstiréttur staðfesti í upphafi mánaðar. Þar kemur fram að fyrrverandi kærastinn hafi verið heima hjá sér ásamt þremur vinum sínum. Ingibjörg Eva er sögð hafa hringt í hann ítrekað og var hann orðinn þreyttur á því áreit. Hann mun því hafa látið stúlku sem var á heimili hans svara í símann.

Ingibjörg Eva er sögð hafa brugðist illa við þessu og fékk maðurinn stutt síðar SMS þar sem Ingibjörg Eva sagðist hlakka til að hitta þau. Samkvæmti dómi þá var Ingibjörg Eva stuttu síðar mætt á heimili hans ásamt öðrum manni en þau voru bæði vopnuð og með klúta fyrir andlitum sínum.

Fyrrverandi kærastinn segist fullviss um að hún hafi ætlað að myrða sig, samkvæmt dómi Hæstaréttar. Vitni að árásinni sem var að ganga í Norðurmýrinni umrædda nótt lýsti því í skýrslu hjá lögreglu að hún hafi heyrt einhvern segja „hún stakk hann, hún stakk hann“. Þá hafi hún heyrt konuna segja við manninn sem fylgdi henni „hvar er hnífurinn minn, hvar er kylfan mín“ en hann hafi svarað „ég faldi dótið“.