Romelu Lukaku, framherji Manchester United var frábær í 2-1 sigri liðsins á Chelsea um helgina.

Lukaku skoraði jöfnunarmark United í fyrri hálfleik og lagði svo upp sigurmark leiksins fyrir Jesse Lingard í síðari hálfleik.

Framherjinn hefur verið talsvert gagnrýndur fyrir sína frammistöðu á leiktíðinni en Alan Shearer vill meina að ákveðnir leikmenn Manchester United haldi aftur af honum.

„Ég vorkenni Lukaku stundum. Leikstíll liðsins hentar honum ekki alltaf, sérstaklega ekki þegar að Matic og Herrera eru á miðjunni,“ sagði Shearer.

„Þegar að þeir fá boltann þá eru þeir ekki mikið að hugsa um að senda hann fram á við. Þeir horfa til hægri og vinstri og ef það er ekki laus maður þá senda þeir tilbaka.“

„Ef þeir myndu hins vegar horfa oftar fram á völlinn þá myndu þeir sjá að Lukaku er oft mjög frír og ef hann myndi fá boltann oftar í svæðinu þá væri mun auðveldara fyrir hann að koma sér inn í leikinn,“ sagði hann að lokum.