Paul Pogba, miðjumaður Manchester United er að ganga í gegnum erfiða tíma hjá félaginu sínu þessa dagana.

Hann var keyptur til félagsins sumarið 2016 fyrir tæplega 90 milljónir punda og voru miklar vonir bundnar við leikmanninn.

Hann hefur hins vegar ekki verið að spila vel í undanförnum leikjum og er nú kominn á bekkinn hjá United og virðist Jose Mourinho, stjóri liðsins vera búinn að missa trúna á leikmanninum.

Didier Drogba, fyrrum lærisveinn Jose Mourinho telur hins vegar að stjórinn sé að reyna kveikja í leikmanninum, með því að geyma hann á bekknum.

„Við rifumst oft á tíðum, ég og Mourinho en hann mun aldrei ráðast á neinn sem honum líkar ekki vel við,“ sagði Drogba.

„Hann er mjög hrifinn af Paul en hann vill að hann sýni meiri ábyrgð, bæði innan vallar sem utan,“ sagði Drogba að lokum.