Aðdáendur sænsk-dönsku sakamálaþáttanna Broen geta tekið gleði sína á ný en aðalhandritshöfundur þáttanna, Hans Rosenfeldt, greindi frá því í vikunni að vinna sé hafin við fjórðu þáttaröðina. Áður hafði verið greint frá því að þættirnir yrðu ekki fleiri.

Nýja þáttaröðin sem verður þó ekki tekin til sýninga fyrr en í fyrsta lagi á næsta ári verður í anda hrekkjavökunnar. Söguþráðurinn verður að sama skapi einfaldari en töluvert hryllilegri heldur en í fyrri þáttaröð. Ákveðið var að hefjast handa við handritsgerð þar sem aðdáendur þáttanna gátu með engu móti sætt sig við að sambandi þeirra við hina stórkostlegu Sögu Norén væri endanlega lokið.

Þetta kemur fram í sænska miðlinum Local.se. Þar segir sömuleiðis að þáttaröðin byrji, venju samkvæmt, á glæp sem krefst þess að danska og sænska lögreglan vinni saman að rannsókn málsins.

Rosenfeldt segir að þáttaröðin verði minni í sniðum en sú þriðja:

„Ég myndi þó segja að hún væri hryllilegri.“ Hann upplýsir að hún byrji á því að morð sé framið á hrekkjavöku í Danmörku.

Aðeins fimm persónur úr þriðju þáttaröðinni verða í þeirri fjórðu. Saga Norén verður að sjálfsögðu fremst í flokki. Danski rannsóknarlögreglumaðurinn Henrik og lögreglustjórarnir þeirra verða sömuleiðis í nýju þáttunum. Hinar sögupersónurnar hafa aldrei komið við sögu áður.