Félag heyrnarlausra sendir frá sér yfirlýsingu
„Stjórn félagsins treystir lögreglu til að vinna að rannsókn málsins og mun gera allt sem hægt er til að aðstoða lögreglu við þá rannsókn þannig að málið upplýsist sem fyrst,“ segir í yfirlýsingu sem stjórn Félags heyrnarlausra hefur sent frá sér.
Eins og DV greindi frá í gær var heyrnarlaus kona flutt af lögreglu í Kvennaathvarfið fyrir skemmstu vegna gruns um að hún væri fórnarlamb mansals. Mun konan, sem er frá Rússlandi, hafa verið neydd til að selja happdrættismiða fyrir aðila sem sá um fjáröflun fyrir Félag heyrnarlausra.
Daði Hreinsson, framkvæmdastjóri Félags heyrnarlausra, vísaði því á bug í Fréttablaðinu í dag að um mansal væri að ræða. Þeir sem sjá um að selja happdrættismiða fá 25 prósent af sölu happdrættismiðanna í laun, en konan mun hins vegar einungis hafa fengið 15 prósent af andvirði sölunnar. Daði sagði að um samkomulag hafi verið að ræða milli hennar og starfsmannsins gegn því að hún fengi gistingu á heimili hans.
Í yfirlýsingunni sem Félag heyrnarlausra hefur sent frá sér segir:
„Síðastliðinn mánudag kom starfsmaður félagsins, sem gegnir starfi fjáröflunarstjóra, á fund framkvæmdastjóra félagsins og tjáði honum að lögregla væri að rannsaka mál sem tengdist honum. Að sögn starfsmannsins hafði lögreglan spurst fyrir um dvöl erlendra gesta hjá starfsmanninum. Þegar í stað var ákvörðun tekin um að senda viðkomandi starfsmann í leyfi á meðan málið er til rannsóknar hjá lögreglu. Viðbrögð stjórnar félagsins munu síðan ráðast af því hver niðurstaða rannsóknar lögreglu verður. Stjórn félagsins treystir lögreglu til að vinna við rannsókn málsins og mun gera allt sem hægt er til að aðstoða lögreglu við þá rannsókn þannig að málið upplýsist sem fyrst.
Í áratugi hefur starf Félags heyrnarlausra verið byggt á frjálsum framlögum og fjáröflun t.d. happdrættissölu. Allir sölumenn félagsins fá að lágmarki greidd sölulaun sem nema 25% af seldum miðum. Komi til aukakostnaðar t.d. gistikostnaðar vegna söluferða úti á landi hefur félagið jafnframt greitt þann kostnað. Um erlenda heyrnarlausa einstaklinga sem dvelja tímabundið á Íslandi og óska eftir að selja happdrætti fyrir félagið gilda sömu reglur og innlendir væru.
Stjórn Félags heyrnarlausra harmar það mál sem fjallað er um í fjölmiðlum í dag og lítur það mjög alvarlegum augum. Ef brotið er á rétti heyrnarlauss fólks hefur félagið veitt öllum þeim sem til þess hafa leitað aðstoð og leiðbeint þeim um rétt sinn.“