Það var hitað upp fyrir opnunarleik Bestu deildarinnar annað kvöld milli Víkings og Breiðabliks í Íþróttavikunni.

Víkingurinn Tómas Guðmundsson og Blikinn Kristján Óli Sigurðsson voru þar gestir Helga Fannars.

Það vakti athygli þegar Gísli Eyjólfsson gekk í raðir ÍA í vetur er hann kom heim úr atvinnumennsku en fór ekki í Breiðablik, hvar hann var lengi lykilmaður áður en hann fór út.

Tómas segir að samkeppnisaðilar Breiðabliks í Víkingi hafi fagnað þessu mjög.

„Það voru margir í Fossvoginum sem skáluðu þegar þeir fréttu að Blika væru ekki að taka Gísla Eyjólfs,“ sagði hann.

„Þeir höfðu bara ekki efni á honum. Mér finnst eiginlega ótrúlegra að Víkingar hafi ekki farið í hann,“ svaraði Kristján þá áður en Tómas tók til máls á ný.

„Það eru fleiri ákvarðanir sem Blikar hafa tekið sem maður hefur fagnað sem Víkingur, að losa Damir og semja svo við Kidda Jóns og Kristinn Steindórs, sem eru jafngamlir. Þeir fylltu svo skarð Damirs með Ívari Erni, sem er flottur hafsent en Damir er betri og enn í fínu standi.“

„Hefði þá ekki verið meira vit í því að halda í Damir, eyða ekki 14 milljónum í nýjan miðvörð og ná í Gísla Eyjólfs?“ velti þáttastjórnandinn Helgi þá upp vegna fyrri ummæla Kristjáns um að peningar hafi ekki verið til staðar fyrir Gísla.

„Þetta er mjög valid punktur og þeir sem stjórna verða að svara fyrir þetta. Ég stjórna því miður engu þarna, þá væri þetta ekki svona,“ sagði Kristján þá.