Fyrirhuguð staðsetning kaffistofu Samhjálpar að Grensásvegi 46 hefur vakið miklar áhyggjur sumra íbúa í hverfinu vegna nálægðar við skóla og íþrótta- og tómstundastarf barna.
Hafa umboðsmanni barna borist ábendingar foreldra um þetta. Af því tilefni hefur umboðsmaður barna sent bréf á skrifstofu borgarstjóra þar sem bent er á að leggja beri sérstakt mat á áhrif ákvarðana um skipulagsmál á börn. Í bréfinu segir:
„Samkvæmt lögum um umboðsmann barna, nr. 83/1994, er það hlutverk embættis umboðsmanns barna að vinna að því að fullt tillit sé tekið til réttinda, þarfa og hagsmuna barna, með því að setja fram ábendingar og tillögur um úrbætur sem snerta hag barna á öllum sviðum samfélagsins. Þá ber umboðsmanni jafnframt að stuðla að því að samningur Sameinuðu þjóðanna um réttindi barnsins, Barnasáttmálinn, sem lögfestur var hér á landi með lögum nr. 19/2013, sé virtur ásamt öðrum alþjóðasamningum sem varða réttindi og velferð barna.
Umboðsmaður barna vill því árétta fyrir Reykjavíkurborg, að áður en ákvarðanir eru teknar á vettvangi borgarinnar, eins og t.d. um skipulagsmál, ber að leggja sérstakt mat á áhrif þeirra á börn, en slíkt mat ætti ávallt að fara fram á fyrstu stigum umræðu eða ákvarðanatöku. Matið er liður í því að kanna hvort ákvörðunin samræmist 3. gr. Barnasáttmálans, sem kveður á um að það sem börnum er fyrir bestu skuli ávallt hafa forgang, þegar gerðar eru ráðstafanir sem varða börn. Leiði mat á áhrifum í ljós að um neikvæð áhrif á börn er að ræða, ber stjórnvöldum skylda til þess að leita allra leiða til þess að fyrirbyggja slík áhrif, og grípa til mótvægisaðgerða í þeim tilvikum þar sem það er ekki unnt. Þannig er tryggt að ákvörðun hverju sinni samræmist 3. gr. Barnasáttmálans.“
Umboðsmaður barna, Salvör Nordal, tekur fram í bréfinu að embættið taki ekki afstöðu til þess hvort fyrirhuguð staðsetning kaffistofunnar sé heppileg, en tilgangurinn sé „að vekja athygli borgaryfirvalda á þeirri skyldu, sem á þeim hvílir, samkvæmt ákvæðum Barnasáttmálans, um að leggja ávallt mat á áhrif ákvarðana á börn, til að tryggja réttindi og hagsmuni barna í þeirra nærumhverfi.“
Bréfið í heild má lesa hér.
