Um er að ræða alþjóðlegt kvikmyndaverkefni sem stór hópur erlendra og íslenskra kvikmyndagerðarmanna tekur þátt í.
Myndinni er leikstýrt af Baskanum Mikel Aguirresarobe en ef marka má IMDB.com er söguþráður myndarinnar athyglisverður í meira lagi.
„Koldo er fenginn til að kaupa þorskvinnslufyrirtæki í Hólmavík og kemur þangað aðeins nokkrum dögum áður en Ísland hyggst afnema lög sem hafa heimilað dráp á Böskum frá árinu 1615.“
Auk Cantona fara með helstu hlutverk Sergio Peris-Mencheta og Ingrid García-Jonsson. Þá fara Íslendingar einnig með hlutverk í myndinni, til dæmis Sigurður Sigurjónsson, Halldóra Geirharðsdóttir, Björn Stefánsson og Hannes Óli Ágústsson.
Á vef Husavik.com er rætt við Ingibjörgu Benediktsdóttur, sveitarstjórnarfulltrúa í Norðurþingi sem á ættir að rekja til Hólmavíkur. Hún segir verkefnið hafa vakið mikla athygli í sinni gömlu heimabyggð.
„Þetta er stórt verkefni og mikil stemning í kringum það,“ segir Ingibjörg. „Það er alltaf spennandi þegar alþjóðleg kvikmyndagerð kemur til svona lítilla staða, og það getur haft jákvæð áhrif langt fram í tímann.“
Eric Cantona gerði garðinn frægan hjá Manchester United og franska landsliðinu. Hann varð fjórum sinnum Englandsmeistari með liðinu og var valinn leikmaður ársins í ensku deildinni árið 1994. Eftir að hann lagði skóna á hilluna hefur hann leikið í fjölmörgum kvikmyndum og virðist hvergi nærri hættur á því sviði.
