Fyrrverandi framherji Wolves og Nottingham Forest, Rafa Mir, gæti átt yfir höfði sér þungan fangelsisdóm eftir að spænskir saksóknarar kröfðust refsingar í máli sem tengist alvarlegu kynferðisbroti.

Saksóknarar á Spáni sögðu að þeir færu fram á samtals tíu og hálfs árs fangelsisdóm yfir hinum 28 ára knattspyrnumanni, sem leikur nú með Elche í La Liga á láni frá Sevilla.

Mir var ákærður í október á síðasta ári eftir langa rannsókn sem hófst þegar hann var handtekinn í september 2024. Rannsóknardómari taldi þá að næg gögn væru til staðar til að setja hann fyrir dóm.

Samkvæmt dómsgögnum var hann ákærður fyrir kynferðisbrot með ofbeldi og samræði.

Konan sem lagði fram kæruna var 21 árs þegar atvikið á að hafa átt sér stað. Hún heldur því fram að árásin hafi átt sér stað á heimili Mir í bænum Bétera, skammt frá Valencia, eftir að þau höfðu hist á skemmtistað.

Vinur Mirs, Pablo Jara, var einnig handtekinn og ákærður fyrir aðra kynferðisárás á vinkonu konunnar.