Fyrirspurn Myndlistarskólans í Reykjavík um skammtímastæði fyrir hreyfihamlaða nemendur við skólann fékk neitun hjá skipulagsfulltrúa.

Á afgreiðslufundi skipulagsfulltrúa á þriðjudag var tekin fyrir fyrirspurn skólans frá 10. október 2025, um setja skammtímastæði fyrir nemendur og aðstandendur skólans fyrir framan lóðina nr. 10. við Rauðarárstíg.

Óskað var eftir afstöðu skipulagsfulltrúa á möguleika þess að sett verði upp bílastæði í borgarlandi fyrir hreyfihamlaða við Rauðarárstíg 10 þar sem skólinn er. Ásamt fyrirspurn voru lagðir inn uppdrættir vegna hugmynda sem sýna 4 sérmerkt stæði vegna ferðaþjónustu fatlaðra.

Í niðurstöðu skipulagsfulltrúa kom fram að bílastæði í borgarlandi eru ekki sérmerkt ákveðnum aðilum nema í undantekningartilfellum, svo sem sérmerkt stæði fyrir hreyfihamlaða (það er á skráningarnúmer ökutækis), bílastæði fyrir ráðherra og sendiráð. Kom fram að innan lóðar hússins eru einnig bílastæði sem eiga að fullnægja þörf þeirra húsa sem eru innan hennar. Því er ekki hægt að verða við því að sérmerkja stæði fyrir skólann eins og fyrirspurnin leggur upp með.

Tekið var fram að unnið er að breytingum við Rauðarárstíg og stendur til að hafa tvö bílastæði fyrir fatlaða í nálægð við Myndlistaskólann. Þau stæði verða ekki sérmerkt en munu þá samnýtast skólanum eins og segir í umsögninni. Niðurstaðan var því að ekki er hægt að verða við ósk um að gera sérmerkt stæði í borgarlandi.