Ellefu einstaklingar sem tilheyrðu kínversku Ming-glæpafjölskyldunni voru teknir af lífi í Kína í gær. Hópurinn var dæmdur fyrir umfangsmikla svikastarfsemi, morð og aðra glæpi í Mjanmar.

Breska ríkisútvarpið greinir frá þessu. Dauðadómarnir voru kveðnir upp í lok september á síðasta ári.

Alls voru 39 dæmdir í málinu og hlutu ellefu lífstíðarfangelsi auk þeirra ellefu sem hlutu dauðadóm. Hinir fengu fangelsisdóm frá 5 árum til 24 ára.

Ming-fjölskyldan er sögð hafa unnið fyrir eina af fjórum ættum sem fóru með völd í landamærabænum Laukkaing í Mjanmar, skammt frá landamærum Kína. Var bænum breytt í einskonar miðstöð fjárhættuspila og eiturlyfja. Mátti þar einnig finna tölvuver sem nýtt voru undir ýmsa svikastarfsemi.

Talið er að Ming-fjölskyldan hafi haft gríðarlega fjármuni upp úr krafsinu frá árinu 2015, eða 10 milljarða júana sem jafngildir um 150 milljörðum króna.

Yfirvöld í Mjanmar fóru í rassíu árið 2023 og voru meðlimir fjölskyldunnar framseldir til Kína í kjölfarið.