Erla Björg Gunnarsdóttir ritstjóri fréttastofu Sýnar hefur sagt upp störfum eftir að hafa stöðunni í hálft fimmta ár og starfað hjá fréttastofunni í alls 13 ár. Erla Björg greindi í morgun frá ákvörðun sinni. Formleg starfslok hafa ekki farið fram en Kolbeinn Tumi Daðason fréttastjóri mun taka við stjórnartaumum fréttastofunnar frá og með deginum í dag, eins og segir í frétt Vísis.

„Það hefur verið einstakt að vera hluti af þessum magnaða hópi sem er á fréttagólfinu, að fá að sjá fólk vaxa og dafna í starfi sínu, takast á við erfið mál með samheldni að vopni og fagna saman litlum og stórum sigrum. Því fylgir ótrúlegur kraftur sem hefur fleytt mér í gegnum ótal áskoranir í rekstri fréttastofunnar sem tekur sífelldum breytingum í takt við breytingar í yfirstjórn og stefnu félagsins. Nú er aftur á móti kominn tími til að annar taki við keflinu en ég mun alltaf búa að þessum krafti og tek hann með mér inn í næsta óskrifaða kafla,“ segir Erla Björg.

„Það verða mikil viðbrigði að hitta ekki Erlu daglega á fréttagólfinu en nú er komið að tímamótum. Fréttastofan er skipuð afar öflugu fólki sem mun halda áfram að gera það sem það gerir best. Að flytja fólkinu í landinu traustar fréttir alla daga ársins,“ segir Kolbeinn Tumi, sem varð fréttastjóri Vísis árið 2014 og fréttastofunnar allrar árið 2021, á sama tíma og Erla Björg tók við stöðu ritstjóra.