Bæjarráðsfulltrúi í borginni Avondale í Arizona er nú sökuð um barnarán. Samkvæmt kæru mun hægrikonan Jeannette Garcia hafa áreitt kollega sinn kynferðislega á fögnuði á síðasta ári og í kjölfarið rænt unglingsdóttur hans. Málið hafi haft miklar afleiðingar fyrir stúlkuna.
Garcia hefur áður komist í fréttir en fyrr á þessu ári var hún áminnt fyrir ummæli þar sem hún kallaði leikarann Tom Hanks barnaníðing. Hún starfaði á síðasta ári fyrir hægrisamtökin Turning Point USA sem áhrifavaldurinn Charlie Kirk gerði fræg. Samtökin stóðu fyrir miklum fögnuði eftir kosningasigur Repúblikana í nóvember á síðasta ári. Samkvæmt kæru sem feðginin hafa lagt fram gegn Garcia gerði bæjarráðsfulltrúinn hosur sínar grænar fyrir föðurnum á umræddri skemmtun, en hann var undirmaður Garcia hjá Turning Point. Eftir því sem leið á kvöldið varð Garcia verulega drukkin og gerðist ágengari í áreitni sinni. Er hún meðal annars sögð hafa boðið kolleganum tiltekna stöðu hjá Turning Point í skiptum fyrir kynlíf. Kolleginn hafði þó engan áhuga og leið mjög óþægilega. Skömmu fyrir miðnætti ákvað hann að segja þetta gott og forða sér heim, en þegar heim var komið uppgötvaði hann að 14 ára dóttir hans var horfin.
Hann byrjaði á því að leita að dóttur sinni hjá vinkonu sem hún hafði varið kvöldi sínu með. Dóttirin var ekki þar. Þegar hann sneri svo aftur heim biðu hans lögreglumenn sem sögðu stúlkuna vera á heilu á höldnu, en að hún væri með Garcia. Faðirinn segir í kærunni að hann hafi ekkert botnað í því hvers vegna dóttir hans væri með yfirmanni hans. Hann hafi fengið áfall við þessi tíðindi.
Garcia svaraði ekki í síma fyrr en seint og síðar meir og skilaði stúlkunni ekki fyrr en um hádegi daginn eftir. Að sögn stúlkunnar hafði Garcia komið til hennar ásamt tveimur öðrum, tilkynnt henni að faðir hennar væri á leiðinni heim, sóttölvaður og mögulega ofbeldisfullur. Garcia væri komin til að bjarga henni. Þannig var hún plötuð upp í bíl með bæjarráðsfulltrúanum.
Faðirinn segir þetta galið. Hefði Garcia virkilega óttast um stúlkuna hefði verið hægt að senda hana til ömmu sinnar og afa sem bjuggu í næstu götu. Þess í stað nam Garcia, undir verulegum áhrifum áfengis, stúlkuna á brott.
Feðginin hafa eins stefnt Turning Point og Avondale-borg sem þau segja meðsek. Meðal annars er því haldið fram að lögreglan hafi haft óeðlilega aðkomu að málinu, en Garcia er fyrrum lögreglukona. Málið hafði miklar afleiðingar fyrir stúlkuna en samkvæmt kæru er hún nú skugginn af sjálfri sér. Hún glími við mikla depurð og kvíða.
„Hún þorir varla að yfirgefa heimilið sitt og kemur varla fram úr herbergi sínu; hún vill ekki lengur stunda félagslíf með vinum eða fjölskyldu eða taka þátt í tómstundum; hún vill ekki mæta í skólann og einkunnir hennar hafa liðið fyrir það.“
Garcia hefur sent frá sér yfirlýsingu þar sem hún neitar sök.
„Leyfið mér að koma þessu á hreint: þessar ásakanir eru falskar. Ég hef engum rænt, aldrei skaðað nokkurn og aldrei reynt að kaupa nokkuð ósæmilegt af annarri manneskju. Atvikið sem um ræðir fólst í því að ég var að hjálpa ungri stúlku. Allir sem afbaka slíkan stuðning í eitthvað hrottalegt eru viljandi að dreifa falsupplýsingum. Ég ítreka að þessar ásakanir eiga ekki við rök að styðjast og ég er að undirbúa málshöfðun gegn þeim sem um ræðir fyrir að dreifa þessum lygum og fyrir skaðann sem þau eru að reyna að valda mannorði mínu. Ég mun ekki láta ógna mér, ég læt ekki dreifa um mig óhróðri og ég mun ekki leyfa fölskum ásökunum að hafa áhrif á mannorð mitt eða starf.“
