Þessar kenningar hafa gengið mislangt og héldu sumir því fram að hann væri með lífsógnandi sjúkdóm og á meðan aðrir sögðu að forsetinn væri látinn.
Trump, sem er 79 ára, blés á þessar kenningar í færslu á samfélagsmiðli sínum Truth Social í gærkvöldi. „MÉR HEFUR ALDREI Á ÆVINNI LIÐIÐ BETUR,“ sagði hann og skrifaði með hástöfum eins og hann gerir jafnan.
Talið er að myndir af dökkum marblettum á höndum Trumps og bólgnir ökklar hans hafi komið þessum vangaveltum af stað. Þá bætti ekki úr skák að Trump kom ekkert fram opinberlega um helgina. Fór myllumerkið #whereistrump á mikið flug í kjölfarið.
Varaforsetinn, JD Vance, hellti svo enn meiri olíu á samsæriskenningabálið þegar hann sagði við USA Today að hann væri meira en tilbúinn að stíga inn fyrir Trump ef eitthvað kæmi fyrir.
Vangaveltunum var svo hrundið af blaðamanninum Barak Ravik hjá Axios sem greindi frá því að embættismaður hefði staðfest að forsetinn væri við góða heilsu. Trump sást fyrir utan Hvíta húsið í gær og var hann klæddur í svartar buxur, svartan bol og með hvíta húfu á höfðinu.
Karoline Leavitt, fjölmiðlafulltrúi Hvíta hússins, upplýsti í júlí síðastliðnum að Trump væri með langvinna bláæðabólgu sem hefði meðal annars orsakað væga bólgu í fótleggjum. Sagði læknir forsetans í minnisblaði að um væri að ræða meinlausan og algengan kvilla meðal eldra fólks.
