Maðurinn sem féll til bana á Oasis tónleikunum á Wembley leikvanginum á laugardag hét Lee Claydon. Söfnun er hafin fyrir fjölskyldu Lee sem skilur eftir sig son og unnustu.

The Sun og fleiri bresk dagblöð greina frá þessu í dag.

Meðlimir hljómsveitarinnar Oasis og tónleikagestir voru slegnir eftir að einn aðdáandi féll fram af svölum á Wembley leikvanginum í London á laugardag og lést. Hæðin var talsverð mikil og var hann úrskurðaður látinn á vettvangi.

Nú hefur verið greint frá því að maðurinn hét Lee Claydon, 41 árs fjölskyldufaðir og aðdáandi Oasis til áratuga. Hefur verið sett á laggirnar söfnun fyrir fjölskyldu hans á síðunni Gofundme.

„Fjölskylda okkar er í molum og við eigum erfitt með að takast á við þetta hryllilega og óvænta áfall,“ segir Aaron Claydon, bróðir Lee, á síðunni. „Lee skilur eftir sig son, föður, maka, bræður, systur, frændur og frænkur. Lee var ástsæll fjölskyldumaður, fyrirmynd sonar síns og elskaður svo heitt af allri fjölskyldunni. Lee hefði gert svo mikið fyrir hvert okkar og hann var tekinn allt of snemma frá okkur og við munum sakna hans svo heitt.“

Þegar þetta er skrifað hafa safnast um 2400 pund (400 þúsund krónur) af 4000 punda takmarki, það er 61 prósent.