Donald Trump, Bandaríkjaforseti, er í bullandi vandræðum útaf Epstein-skjölunum svokölluðu. Wall Street Journal greindi frá því í gærkvöldi að dómsmálaráðherrann Pam Bondi hefði upplýst forsetann um það í maí að nafn hans væri að finna víða í skjölunum og var hann í kjölfarið fullvissaður um að skjölin yrðu ekki gerð opinber. Viku áður hafði Trump neitað því staðfastlega að Bondi hefði upplýst hann um þessar staðreyndir.
Það ætti ekki að koma neinum á óvart að Trump hefur brugðist við umfjöllun Wall Street Journal með því að kalla þær falsfréttir.
Óhætt er að fullyrða að sú ákvörðun að birta ekki skjölin hafi reynst Trump afar erfið enda hafði hann lofað stuðningsmönnum sínum því í kosningabaráttunni að skjölin yrðu gerð opinber.
Meðhöndlun málsins hefur verið klaufaleg í meira lagi og þar hefur áðurnefnd Pam Bondi verið fremst í flokki. Hún sagði í viðtali við Fox News í febrúar að skjölin og sérstakur listi með viðskiptavinum Epstein væri á skrifborðinu hennar og ýjaði að birtingu innan skamms. Stuttu síðar birti hún lítinn hluta af skjölunum sem reyndust ekki innihalda neinar nýjar upplýsingar. Óánægjan var því farin að krauma og sprakk út í byrjun júlí þegar tilkynnt var að Epstein-skjölin yrðu ekki gerð opinber ásamt fullvissu um að ekkert bitastætt væri í þeim að finna.
Á sama tíma virðist Ghislaine Maxwell, aðstoðarkona Epstein, ætla loks að leysa frá skjóðunni. Maxwell, sem var dæmd í 20 ára fangelsi fyrir aðild sína að málinu árið 2022, bar ekki vitni þegar réttarhöld yfir henni fóru fram. Nú er ráðgert að hún muni hitta fulltrúa bandaríska dómsmálaráðuneytisins á næstu dögum og leggja fram ýmsar nýjar upplýsingar sem ekki hafa áður komið fram. Hvort að þær upplýsingar verði Trump í hag eða ekki verður að koma í ljós.
Í frétt Wall Street Journal er bent á að það að nafn Trump sé í skjölunum þýði ekki að hann sé endilega bendlaður við neitt saknæmt.
Stærstu fjölmiðlar heims hafa undanfarnar vikur rifjað upp ýmislegt sem tengist sambandi Epstein og Trump í gegnum árin. CNN fjallaði meðal annars um þá áður nánast óþekktu staðreynd að Trump hefði boðið Epstein í brúðkaup sitt og Mörlu Maples árið 1993. Þótt það sýni fram að á að samband tvímenninganna var mun nánar en Trump hefur viljað viðurkenna en hann hefur í gegnum árin gert lítið úr sambandi þeirra.
Vinslit urðu milli Epstein og Trump þegar þeir kepptust um sama fasteignaverkefnið á Palm Beach árið 2004 og höfðu þeir því ekki verið í sambandi í tæp 15 ár þegar Epstein var handtekinn fyrir margvísleg brot árið 2019.
Þá hafa erlendir miðlar rifjað upp yfirheyrslu á Epstein árið 2010 Þar neitaði Epstein í öllum tilvikum að tjá sig nema þegar komið var að Trump en þá játaði Epstein að þeir þekkstust. Hefur það síðan valdið mörgum heilabrotum.
🚨🚨🚨 Watch Jeffrey Epstein plead his Fifth, Sixth, and 14th Amendment rights when asked if he and Donald Trump socialized with females under the age of 18 during a 2010 deposition:
Q: Have you ever had a personal relationship with Donald Trump?
A. What do you mean by „personal… pic.twitter.com/JyM5LYJ0C4— MeidasTouch (@MeidasTouch) July 24, 2025
