Fá myndbönd hafa farið á jafn mikið flug og upptakan af framhjáhaldsparinu á Coldplay tónleikunum nýverið. Um 120 milljónir hafa horft á upprunalega myndbandið á TikTok og endalaus afrit og grínútgáfur hafa verið gerðar.
Í viðtali við bresku sjónvarpsstöðina ITV greinir Grace Springer, 28 ára gömul kona sem tók upp myndbandið á Gillette leikvanginum í Boston, frá því að hún hafi ekki fengið einn eyri fyrir myndbandið.
„Ég var að vonast eftir því að sjá sjálfa mig á stóra skjánum og ég elska að festa svona stundir á filmu, það er ástæðan fyrir því að ég var að mynda þetta,“ segir Springer.
Eins og flestir vita var um að ræða svokallaða „kyssumyndavél“, það er þegar myndavél er beint að pari sem oftar en ekki kyssist í kjölfarið. Þegar myndavélinni var beint að Andy Byron og Kristin Cabot kom á þau fát, enda voru að eiga í ástarsambandi fram hjá mökum sínum. Bæði voru þau stjórnendur hjá gervigreindarfyrirtækinu Astronomer en Andy, sem var forstjóri, hefur nú sagt af sér.
„Það voru meira en 50 þúsund manns á tónleikunum og allir tóku eftir þessu. En það var ekki fyrr en eftir tónleikana sem ég leit aftur á efnið með vinum mínum og sá þá hversu illa þetta leit út,“ segir Springer.
Aðspurð hvort hún myndi birta þetta aftur, vitandi af afleiðingunum fyrir fólkið, segir hún að einhver annar hefði hvort eð er gert það.
„Ég finn til með Megan, eiginkonu Andy, fjölskyldu hans og öllum sem eiga um sárt að binda vegna þessa máls en það voru 50 þúsund manns þarna og ég var ekki sú eina sem náði þessu á myndband. Ef ég hefði ekki hlaðið þessu upp hefði einhver annar gert það,“ segir hún.
Hún sagðist ekki hafa grætt neinn pening á þessu og hafi ekki búist við að myndbandið myndi fara svona víða.
