Kjartan Páll Sveinsson, formaður félags strandveiðimanna, var í heimsreisu þegar hann lenti i fangelsi í Egyptalandi. Kjartan Páll ræðir fangelsisvistina og aðdragandann að henni í viðtali í Sjókastinu.

„Vegabréfinu mínu var stolið í Egyptalandi og ég þurfti sem sagt að fá nýtt sent frá Íslandi. Og það tók nú svolítinn tíma. Þetta var 2001 og og internetið var bara ungabarn á þessum tíma,“ segir Kjartan Páll sem var þá 23 ára gamall.

Segist hann hafa passað sig á að spyrja lögregluna hvort að glænýtt vegabréf yrði eitthvað mál, en í því var enginn stimpill inn í landið.

„Þeir segja nei nei og skrifa þarna einhverja skýrslu fyrir mig á arabísku sem ég gat ekkert lesið sjálfur, vissi ekkert hvað stóð í henni. Og svo ætlaði ég að taka sem sagt bátinn yfir frá Egyptalandi frá Sínaískaganum og yfir til Jórdaníu. Og þá er landamæravörðurinn, hann bara skoðar vegabréfið og segir: „Heyrðu, þú ert ekki með neinn stimpil inn í landið.“ Þannig að ég læt hann fá bréfið og hann segir: „Þetta meikar ekkert sens.“

Kjartan Páll segist ekki hafa hugmynd um hvað stóð í bréfi lögreglunnar, þar hefði alveg eins getað verið uppskrift að kjúklingarétti. Hann lýsti því fyrir landamæraverðinum hvernig hann komst inn í landið og öryggisvörðurinn hringdi í sendiráðið þar sem lágu fyrir gögn um að Kjartan Páll hefði fengið stimpil. Öryggisvörðurinn var þó ekki sannfærður.

„Hann segir: „Ég held að þetta sé bara ekki rétt. Ég held að þú hafir selt vegabréfið þitt í Súdan og komið gangandi inn í Egyptaland.“ Þetta heitir fjörutíu daga leiðin vegna þess að þú ert fjörutíu daga að fara þarna á kameldýrum. Þannig að mér var stungið þarna í fangelsi og það var ekki ekki skemmtileg lífsreynsla.“

Kjartan Páll mátti dúsa sólarhring í fangelsinu og segir að verðir hafi sífellt verið að koma inn og spyrja hann með vegabréfið.

„Og bara eftir 24 klukkutíma þá sagði ég bara: „Heyrðu, hvað gerist ef ég játa?“

Kjartan Páll fékk þau svör að hann yrði þá sendur úr landi. „Ég sagði: „Já, heyrðu, þá bara gerðist þetta svona. Þannig að ég er víst kominn á einhvern svartan lista og má aldrei fara til Egyptalands aftur.“

Aðspurður um hvort hann hafi ekki verið hræddur svarar Kjartan Páll:

„Jú, ég var skíthræddur og egypsk fangelsi er ekkert skemmtilegt. Maður heyrði svona alls kyns hljóð sem að var greinilega líkamar að hérna slengjast utan í einhverja harða hluti. Öskur og óp og svona.“

Enginn úr fjölskyldu eða vinahópi Kjartans Páls vissi af þessu meðan á stóð.

„Sem var eins gott vegna þess að mamma og pabbi voru alveg nógu áhyggjufull fyrir. Það var ekki fyrr en ég kom heim til Íslands sem ég sagði þeim frá þessu.“

Hlusta má á viðtalið við Kjartan Pál og önnur viðtöl Sjókastsins í heild sinni á YouTube og Spotify. 

Umræðan um fangelsisvistina hefst á mínútu 0:11:11.