Guðmundur Andri Thorsson, rithöfundur og fyrrverandi þingmaður Samfylkingarinnar, er ómyrkur í máli á Facebook-síðu sinni og segir að virkja þurfi 71. grein þingskaparlaga sem veitir þingforseta heimild til að takmarka ræðutíma.
„Minnihlutinn á Alþingi lítur á sig sem hinn náttúrulega meirihluta og núverandi ástand sem óeðlilega undantekningu sem ekki beri að virða. Þess vegna lætur þetta fólk eins og það sé við stjórnvölinn og stöðvar störf þingsins. Minnihlutaflokkarnir taka sér vald yfir þingstörfunum sem kjósendur hafa ekki veitt þeim,“ segir hann og heldur áfram:
„Málþóf er niðurlægjandi. Það er ekki umræða heldur eftirlíking á umræðu. Það er afskræming á umræðu, sem er eitt það mikilvægasta sem fram fer innan veggja þingsins: að ræða mál vel og ýtarlega út frá öllum sjónarmiðum. Málþóf er skrípamynd af slíkri iðju, gerir lítið úr henni.“
Hann segir að málþóf sé niðurlægjandi fyrir þann sem tekur þátt í því vegna þess að þar með sýnir hann þingræðinu lítilsvirðingu – mikilvægasta og virðulegasta umræðuvettvangi þjóðarinnar. Hann geri um leið lítið úr sjálfum sér og trúnaðarstöðu sinni.
„Það er niðurlægjandi fyrir flokksformenn sem vilja gefa þá mynd af sér að vera tilbúnir að takast á hendur æðstu virðingarstöður í þjónustu lands og þjóðar. Það er niðurlægjandi fyrir ríkjandi meirihluta hverju sinni sem horfir ráðalaus á þessa gíslatöku ræðustólsins. Það er niðurlægjandi fyrir þjóðina að búa við svo óskilvirkt þingræðisfyrirkomulag.“
Færslu sína endar Guðmundur Andri á þeim orðum að það hljóti að vera meðal forgangsverkefna núverandi þingmeirihluta að koma Alþingi í starfhæft form.
„Ég sé ekki að það verði gert öðruvísi en með því að virkja 71. grein þingskaparlaga, sem veitir forseta þingsins heimild til að takmarka ræðutíma.“
