Jón Óttar Ólafsson, fyrrverandi lögreglufulltrúi hjá embætti sérstaks saksóknara, lagði fram kæru á hendur Ólafi Þór Haukssyni, héraðssaksóknara og þar áður sérstakan saksóknara, fyrir rangar sakargiftir síðastliðinn mánudag.

Fjallað er um þetta í Morgunblaðinu í dag.

Kæran sem um ræðir á rætur að rekja til ársins 2012 og tengist vinnu hans fyrir þrotabú Milestone. Segir Morgunblaðið að í kærunni sé fullyrt að Ólafur Þór hafi lagt fram kæru gegn Jóni Óttari gegn betri vitund sem byggði á röngum forsendum og fölsuðum gögnum.

Jón Óttar er sagður leggja fram gögn máli sínu til stuðnings sem eiga að benda til þess að Ólafi hafi verið kunnugt um að kæran væri ekki á rökum reist. Þannig hafi vinna hans fyrir skiptastjóra Milestone verið heimiluð af öðrum saksóknara innan embættisins og Ólafi hafi verið kunnugt um það.

Þá er, samkvæmt frétt Morgunblaðsins, minnt á að refsing fyrir rangar sakargiftir sé allt að tíu ára fangelsi. Málið er rakið nánar í Morgunblaðinu í dag.