Fólk í mennta-og menningarstofnunum á Íslandi er mjög ósátt við að þjóðminjavörður hafi ákveðið að segja upp þremur fornleifafræðingum hjá Þjóðminjasafni Íslands. Samkvæmt heimildum DV skilur fólk ekki þessa ákvörðun, á erfitt með að sjá rökin fyrir þessu og telur þetta alveg galið.
Sigurður Gylfi Magnússon, prófessor í sagnfræði við Háskóla Íslands, segir meðal annars um þetta á Facebook:
„Það voru að berast þær fréttir að þjóðminjavörður, Harpa Þórsdóttir, væri búin að reka þrjá fornleifafræðinga vegna skipulags-og áherslubreytingar í þessu höfuðsafni landsins.“ Hann bætir svo við: „Hvernig er hægt að komast upp með svona framkomu án þess að gefa skýringar nema málamynda yfirklór? Hvernig er hægt að réttlæta það að segja upp þremur af fjórum fornleifafræðingum sem starfa við Þjóðminjasafn Íslands þegar þessi stofnun hefur fyrir nokkrum árum verið gerð háskólastofnun sem krefst vísindalegra gæða af starfsfólki sínu? Er hægt að hugsa sér þjóðminjasafn án fornleifafræðinga? Hvar í heiminum væri slíkt á dagskrá?“
Prófessorinn hvetur fólk til að láta í sér heyra vegna þessa máls og segir: „Ég vil hvetja fagfólk í hugvísindum til að rísa upp og mótmæla þessum gjörningi. Þetta nær ekki nokkurri átt.“
