Bikarmeistarar Breiðabliks tóku á móti Selfyssingum í Kópavoginum í Bestu deild kvenna í kvöld.

Hildur Antonsdóttir skoraði eina mark leiksins á 29. mínútu í 1-0 sigri Blika. Breiðablik fer því upp fyrir Selfoss og situr nú í fjórða sæti með 15 stig. Selfoss er í fimmta sæti með 14 stig en þetta var annar tapleikur liðsins á tímabilinu í átta leikjum.

Þá fengur KR-ingar Þrótt R. í heimsókn í Vesturbæinn. Heimakonur leiddu 1-0 þegar gengið var til búningsklefa með marki frá Hildi Lilju Ágústsdóttur á 17. mínútu. Þróttarar sneru leiknum sér í vil í síðari hálfleik og var Katla Tryggvadóttir í algjöru aðalhlutverki er hún skoraði þrennu.

Katla jafnaði fyrst metin á 61. mínútu og kom svo gestunum í forystu úr vítaspyrnu á 78. mínútu áður en hún innsiglaði sigurinn þremur mínútum síðar og lokatölur 3-1 Þrótturum í vil. KR situr áfram á botninum með 3 stig. Þróttur er í þriðja sæti með 16 stig.