Breiðablik lagði fram tilboð í Steven Lennon framherja FH á dögunum. Samkvæmt heimildum Fótbolta.net bauð Breiðablik 750 þúsund krónur.
„Það er spurning hvenær tilboð er tilboð. Þetta var nær því að vera fyrirspurn og að hitt hafi verið fyrir frímerki,“ sagði Jón Rúnar Halldórsson formaður FH við Fótbolta.net í dag.
„Það er komin ný stjórn þarna og ég er ekki alveg búinn að læra á húmorinn hjá því en ég hef alltaf gaman af því þegar fólk er með húmor.“
Ný stjórn tók við hjá knattspyrnudeild Blika á dögunum. Ljóst er að FH myndi ekki selja einn sinn besta mann fyrir slíka upphæð.
