Willum Þór Þórsson, þjálfari KR, var hundfúll með að fá ekki stigin þrjú í kvöld er liðið mætti KA.
Markalaust jafntefli var niðurstaðan en KR virtist hafa tryggt sér sigurinn undir lokin en markið dæmt af.
,,Ég sé bara frábært skot frá Tobiasi og hreint sjónarhorn hjá markverði og hann nær honum ekki. Ég skil ekki ákvörðun dómarans,“ sagði Willum.
,,Þeir komu hér augljóslega, lágu til baka og ætluðu að verja markið sitt. Þetta er líkamlega sterkt lið og þeir beittu þeim styrk. Þeir gáfu tóninn með því að sparka okkar öfluga sóknarmann út úr leiknun snemma. Bara árás.“
,,Við höndluðum það vel og héldum boltanum vel og byggðum upp fínar sóknir. Stundum þarf að halda einbeitingu og sýna þolinmæði sem við gerðum vel svo klárum við þetta með marki.“
