Snarræði og hárrétt viðbrögð starfsmanna Ásvallalaugar og sundlaugargests björguðu líf Geirs Friðgeirssonar barnalæknis sem missti meðvitund og fór í hjartastopp á hlaupabretti í Reebok Fitness í Hafnarfirði um miðjan janúarmánuð.

Eftir að Geir hné niður á hlaupabrettinu komu mennirnir nánast strax aðvífandi. Vegna kunnáttu þeirra og notkunar á hjartastuðtæki sem var á staðnum er Geir, nú aðeins tveimur vikum síðar, kominn á ról á nýjan leik og þau hjónin, Geir og Kolbrún Þormóðsdóttir, eru afar þakklát fyrir björgunina.

Eirikurjonsson.is greindi fyrst frá þessu á heimasíðu sinni á fimmtudag. Þá segir að hjónin hafi á dögunum farið í Ásvallalaug og hitt bjargvætti Geirs og lýstu þar yfir innilegu þakklæti og hrósuðu hlutaðeigandi fyrir þekkingu þeirra og viðbrögð.

Mikilvægt er að sem flestir kunni skyndihjálp, hafi kjark til að bregðast við og stökkva inn í aðstæður sem þessar og að viðeigandi tæki séu tiltæk. Hárrétt viðbrögð björguðu lífi Geirs.