Cristiano Ronaldo skoraði og svaraði stuðningsmönnum andstæðingsins eftir 2-0 sigur Al-Nassr gegn Al-Ahli í sádiarabísku deildinni í gær.
Ronaldo kom Al-Nassr yfir á 76. mínútu áður en Kingsley Coman gulltryggði sigurinn.
Eftir leikinn létu stuðningsmenn Al-Ahli Ronaldo heyra það og bentu til að mynda á að liðið hafi unnið Meistaradeild Asíu, á meðan Ronaldo hefur ekki unnið titil frá því hann kom til Sádí fyrir rúmum þremur árum.
Portúgalinn svaraði þeim svo í viðtali eftir leik. „Ég á fimm Meistaradeildartitla,“ sagði hann brosandi og á þar auðvitað við Meistaradeild Evrópu.
Cristiano Ronaldo: “I have five Champions Leagues”. 🏆🏆🏆🏆🏆🖐🏽 pic.twitter.com/G5ARihr3VJ
— Fabrizio Romano (@FabrizioRomano) April 29, 2026
Sigurinn styrkir stöðu Al-Nassr á toppi deildarinnar og er félagið nú á góðri leið með að vinna titilinn loksins.
Merih Demiral, tyrkneskur varnarmaður Al-Ahli, var allt annað en sáttur við dómgæsluna eftir leik og í deildinni almennt.
Á dögunum var fjallað um óánægjuraddir með dómgæsluna í deildinni og voru kenningar á lofti um að það ætti að færa Ronaldo titilinn sem hann hefur aldrei unnið.
„Dómgæslan var galin. Sjáðu fótinn á mér, ég næstum fótbrotnaði,“ sagði Demiral eftir leik.
„Alltaf er reynt að ýta þeim í átt að titlinum, við vinnum án þess að fá neina hjálp,“ sagði hann enn fremur, en Al-Ahli hefur orðið Asíumeistari tvö ár í röð.
🚨 Merih Demiral: “The situation with the referees here is crazy”.@Rabanalsafena 🎥 pic.twitter.com/DHpzdwRkot
— Fabrizio Romano (@FabrizioRomano) April 30, 2026
