Senne Lammens, markvörður Manchester United, viðurkennir að hann hafi fengið viðvörun áður en hann gekk til liðs við félagið síðasta sumar. Belginn, sem kom frá Royal Antwerp fyrir um 18 milljónir punda á lokadegi félagaskiptagluggans, hefur þó byrjað lífið á Old Trafford afar vel.

„Ég var aðeins varaður við þessu áður. Mér var sagt að Manchester United væri allt öðruvísi dæmi, sérstaklega þegar kemur að samfélagsmiðlum,“ sagði Lammens.

„Þeir sögðu mér líka að þetta væri eitt stærsta félag í heimi, ef ekki það stærsta.“

Hinn 23 ára gamli markvörður hefur þegar unnið sér inn hylli stuðningsmanna fyrir rólegan og einfaldan leikstíl. Hann segir sjálfur að styrkleiki hans felist í stöðugleika. „Ég er stoltur af því að vera heilsteyptur markvörður, ekki með marga veikleika og reyni ekki að taka óþarfa áhættu.“

Lammens segir að hann hafi rætt mikið við Tom Heaton, þriðja markvörð liðsins, um mikilvægi einbeitingar. „Hann talar um að halda liðinu inni í leiknum og gefa andstæðingnum ekki auðveld færi. Það er stór hluti af því að vera góður markvörður.“

Hann segir einnig að uppeldi sitt hafi mótað sig mikið og haldið honum jarðbundnum. Lammens rifjaði upp þegar hann og kærasta hans voru mynduð af ljósmyndurum í Manchester. „Það var skrýtin upplifun. Fyrst og fremst fyrir kærustuna mína, en þegar ég lít til baka er þetta bara fyndið.“