Pep Guardiola gæti verið á förum frá Manchester City fyrr en margir halda, ef marka má fullyrðingar sjónvarpsmannsins Richard Keys.

City tapaði 2-0 fyrir Manchester United í Manchester-slagnum um helgina. Þetta var fimmta tap City í deildinni á tímabilinu og liðið er enn án sigurs í úrvalsdeildinni árið 2026.

Í kjölfarið sagði Keys á beIN Sports að það væri nánast öruggt að Guardiola hætti hjá City í sumar en sagði að það væri ekki útilokað að það gerðist á næstu dögum.

Keys skrifaði síðar færslu um málið þar sem hann sagðist hafa fengið upplýsingar frá fólki sem þekkti Guardiola vel. Það fólk telji hann á útleið.

Guardiola er með samning hjá City út næstu leiktíð og hefur sjálfur sagt að hann sé hamingjusamur hjá félaginu.