Manchester United gæti endurskoðað hugmyndina um að spila vináttuleiki á miðju tímabili til að brúa vaxandi fjárhagslegt gat hjá félaginu.

Eftir að United féll úr enska bikarnum á sunnudag, í kjölfar taps gegn Brighton & Hove Albion, á félagið aðeins 17 leiki eftir af tímabilinu. Þetta þýðir að United er úr leik í báðum innlendum bikarkeppnum á fyrsta mögulega stigi í fyrsta sinn síðan tímabilið 1981–82.

Í kjölfarið er ljóst að United mun aðeins leika 40 leiki á þessu tímabili, sem er fæst á einu tímabili í 111 ár. Samkvæmt enskum blöðum gæti ferð til Sádi-Arabíu skilað félaginu allt að 10 milljónum punda í tekjur.

Á síðustu leiktíð aflaði United 160,3 milljóna punda í leikdagstekjur eftir 30 heimaleiki, að stórum hluta vegna frábærrar frammistöðu í Evrópudeildinni. Nú, undir stjórn Michael Carrick, mun félagið hins vegar spila tíu færri heimaleiki en í fyrra.

Með hvern heimaleik metinn á um 5,3 milljónir punda er ljóst að verulegt tekjutap blasir við. Fall úr bikarnum hefur einnig skapað stór göt í leikjadagatalið, þar sem United á 13 daga leikhlé í febrúar og annað 10 daga hlé í mars, rétt fyrir síðasta landsleikjahlé tímabilsins.

Stjórnendur félagsins eru því sagðir skoða hvort vináttuleikir utan hefðbundins keppnistímabils geti hjálpað til við að milda fjárhagsleg áhrif þessa óvenjulega stutta tímabils.